أقدم لكم اليوم وصفتى لعمل المكرونة بالبشاميل، وهى الوصفة المعروفة من قديم الزمان ولكن كثير من الأمهات تفشل فيها، واليوم أعرض لكم تكات وحركات لصنع مكرونة بشاميل فى المنزل سهلة وجميلة ومضمون نجاحها بنسبة 100% بإذن الله تعالى.
مدة التحضير: 45 دقيقة.
المقادير:
1/2 كيلو مكرونة فرن.
1/4 كيلو لحم مفرومة، ويمكن استبدلها بكبد وقوانص اذا توافرت بالمنزل
بصلة مبشورة.
1 عدد فلفل أخضر وطماطم .
نصف كيلو لبن مغلى ويكون بارد.
5 معالق دقيق.
ملح، فلفل أسود، بهارات، قرفة عيدان، ورق لورى واللى متاح عندك حطيه
الطريقة:
أولا:- البشاميل
أول حاجة قومى بعمل البشاميل عشان يبرد ويكون تقيل، ويغطى الوش كويس وبكده تكون المكرونة طرية وجميلة.
طريقى فى البشاميل أولا مش بستخدم الأكياس البشاميل الجاهزة ممكن تحطى نص الكيس بس عشان بتكون مالحة لكن الأفضل انك تستخدمى الدقيق، تحطى فى حلة كمية مناسبة للسمن أو الزبدة تكون نفس مقدار الدقيق عشان مايكلكعش معاكى، وتقلبى شوية بعدين تضيفى اللبن وتحطى بهارات وورق لورى، وفلفل اسود وملح مناسب يدوب خفيف عشان لسه باقى المكرونة وماتكونش المكرونة فى الآخر مالحة، واحصلى على قوام تقيل واطفى النار واتركيه جانبا ليبرد .
ثانيا:العصاج:
فى إناء أو طاسة تضعى السمن وعليه البصل المبشور وبعد أن يدبل ضيفى البصل والطماطم حتى يتجانسوا معاً، ثم اضيفى كمية اللحمة المفرومة وقلبيها وضعى عليها البهارات والقرفة العيدان أو دبس رمان لو عندك حتى يتم تسويتها، واتركيها جانباً.
ثالثا: سلق المكرونة
اسلقى المكرونة وضيفى ملح بسيط خالص ولاتضيفى أى مواد دهنية زيت على سلق المكرونة، وده عشان البشاميل ماينزلش لتحت ويترك الوش، وانتبهى لتسوية المكرونة بحيث تكون متماسكة ماتتعجنش.
وبعدين احضرى 2 بيض ضيفى واحدة على البشاميل والتانية خليها للوش لو عندك بقسماط ضيفى شوية على البشاميل مع البيض.
واحضرى الصينية تكون اصغر مقاس وعالية الجوانب، افردى طبقة رقيقة من البشاميل ثم نصف كمية المكرونة بعد تصفيتها بدون غسلها ثم ضيفى العصاج بتاعك، وعليه كمية صغيرة من البشاميل وكملى باقى المكرونة ثم الباشميل كله وهتلاقيه تقيل وغطى وش المكرونة وعامل طبقة كبيرة، وفى الآخر البيضة افرديها على الوش وبعدين على فرن درجة حرارته عالية تاخد 30 إلى 45 دقيقة تسوية.
وبالهنا والشفا
جربيها وهتاكلى احلى مكرونة بشاميل وماتنسوناش بصالح دعائكم واللى تجرب تقول رأيها فى طريقة المركونة بالبشاميل فى الفرن.
ساهم بنشر هذا الموضوع اذ اعجبك
